細價樓不停有新癲價,大角嘴居屋呎價賣到萬五蚊。你覺得好癲?高明唔係咁諗,仲相信今年樓市至少升到十月。
新年有唔少權威樓市專家對今年樓市點評,個別經紀行老闆由好友變淡友,仲有財演力撐佢睇得最準。不過,咁多位名家評樓,竟然冇一個講過今年細價樓升因:SSD空白期。
高明喺呢度再講一次:今年係SSD額外印花稅由兩年升級做三年嘅空白期(二○一二年十月二十七日延長至三年,原本兩年鬆綁SSD嘅供應喺二○一四年十月二十七日斷纜,要到二○一五年十月二十七日後先「回復正常」),要業主畀正常印花稅已經牙痛咁聲,為咗賣樓而無啦啦罰多,自然冇人肯賣樓。
樓市最大供應係二手市場。二手唔肯賣,一手冇可能突然變啲樓盤出嚟。舊年新私樓落成係一萬五千七百間。香港人結婚多數連埋買樓,統計處資料,二○一四年頭十一個月結婚人數係四萬九千幾宗,推算全年有五萬四對夫婦結婚;再加埋舊年淨流入人口至到年中已經有三萬四千人。要有樓住嘅家庭有八萬八個,萬零個供應完全對唔到數。
不過,呢啲數字都係堆砌出嚟扮有做功課,實情係樓價升先有人想買樓,你試下樓市跌,啲人結婚一定會話:哈哈哈乜你買樓咁蠢㗎?當供應受限,全區經紀只得一兩個盤,要買趁手,個樓價一定會升,因為嗰一兩個成交變成整個樓市指標。另外,亦都未有太多人提出,大陸A股舊年升五成,肯定有大陸人發咗,將要換成海外資產避免國內被侵吞嘅國情。樓市升到SSD空白期十月唔難。
就嚟財政預算,財政司長真係要諗吓,政治上,政府可以一邊加BSD買家印花稅,阻止大陸人A股賺到錢來港買磗頭,另一邊放寬SSD年期,放多啲供應出嚟。香港本地人有錢買、銀行又肯借,將來會承受番升跌嘅結果,做乜要阻人?
老友王弼成日推介嘅大新銀行(2356),上個禮拜因為中銀香港(2388)考慮賣南商同集友而炒起。
就當有憧憬,華僑銀行全購永亨要市賬率兩倍,現時大新銀行市賬率未到一倍,大新銀行現價12.96蚊,被收購有少少折讓,股價見二十五蚊唔出奇,代價當然係要等,亦都會悶,如果A股升上4000點,你揸大新郁都唔郁,定力少啲都會心郁換馬,笑唔笑到最後好考EQ。
高明
https://www.facebook.com/BigRiceTea
本欄逢周一刊出