成日都自己複製自己啲劇嘅無綫，今日拉大隊去北京出席《TVB 2016皇牌影視劇及業務發布會》及《愛奇藝TVB策略聯盟》，今次係宣佈同愛奇藝簽署合作協議，將90年代經典劇《創世紀》開拍續集《再創世紀》，兼且仲會開拍《使徒行者2》。

喺今日舉行嘅《使徒行者2》記者會，除咗苗僑偉同許紹雄繼續演出之外，仲會加入陳豪、周柏豪、袁偉豪、黃翠如同宣萱等等。港視回巢嘅蘇萬聰將會擔任監製，做咗好多年好男人角色嘅陳豪，今次會做大反派：「呢個對我嚟講係一個新挑戰，我已經好多年冇做過反派，係加上呢套劇個名對我嚟講亦都有壓力同挑戰，希望可以快啲融入整個團隊。」

佢仲話自己諗咗啲新元素，所以會同監製研究，睇吓點樣加入套劇，提升一吓。「歡喜哥」許紹雄話呢套劇係前傳，所以佢只會有老婆出現，唔會有小三，佢仲搞笑話自己係新人，所以要向向前輩學習。三哥話題材係新故事，仲話要同歡喜哥有啲互動。