啱啱過咗80歲生日嘅富商趙世曾，你唔好睇佢年紀有番咁上下，查實佢仲係好有心有力，身邊啲女伴氹氹轉，認真艷福無邊！今次趙生又俾人捕獲佢同啲女伴去街。讀者劉太日前透過《蘋果》「爆相爆片」，直擊趙世曾與女伴澳門新濠影匯搵食！

讀者劉太話嗰日夜晚8點左右，喺新濠影匯見到趙世曾同一名大約25歲，着住白條紋藍色裙嘅女子一齊出現，不過佢哋全程保持距離前後腳，佢哋去咗一間星期日收費600幾蚊自助餐餐廳Spotlight望咗一陣，不過趙生應該唔係好啱口味，跟住佢哋行咗去另一間食肆，但係佢哋兩個全程都係分開行，冇乜交流，嗰個女仔仲長期墮後行，邊行邊做低頭族篤電話，搞到趙生都不時回頭望住，但未有催對方，之後繼續向住美食街方向行，睇吓有乜嘢啱食！

睇番劉太提供啲相，呢個女仔有啲似近期頻頻孖住佢出出入入嘅大陸佳麗Dora，趙生喺10月打8號風球嗰陣，俾《蘋果》全程影晒佢哋十指緊扣去圓方睇戲，嗰陣趙生唔認係Dora係女朋友，只係話佢係深圳同事，今次佢哋冇拖手，唔同關係又唔同咗？