港台皇牌節目《城巿論壇》唞暑近一個月後，今日開始新一季節目，節目主持人蘇敬恆喺節目開始前同工作人員切燒豬，透露明年、即係2020年係《城巿論壇》開播40周年，仲邀請今日出席嘅嘉賓分享吓，喺當前時局下，有乜想同香港人講？

近日經常被警方針對嘅浸會大學學生會會長方仲賢分享時指，「光復香港 時代革命」係香港人過去三個月喺街頭嗌得最大聲嘅口號，佢希望港人可以從一而終，貫徹呢句口號嘅意義，亦唔好忘記2016年梁天琦因為呢句口號被選舉主任DQ，「希望大家堅持五大訴求，缺一不可」。同場嘅民主派議員毛孟靜原來下星期就會去探梁天琦，做過傳媒嘅Miss Mo話堅信新聞界喺社會上嘅第四權功能，希望每個出席《城巿論壇》嘅嘉賓，都可以「人人講真話」。建制派議員謝偉俊就話，希望多啲議員、巿民同官員未來可以更多參加《城巿論壇》，想祝大家「人月兩團圓，香港快復原」。

雖然特首林鄭月娥近日聲稱會落區聽不同政見人士意見，但原來佢「講一套、做一套」，蘇敬恆喺節目中爆料，早前邀請過林鄭出席今日嘅《城巿論壇》，可惜特首辦方面拒絕咗。據了解，特首辦回覆港台邀請時話，林鄭已經喺公開講話中講咗會同巿民對話，「當有安排時會公佈」，對於未能出席《城巿論壇》，請大家見諒喎。

-----------------------------

香港人權與民主法案祈禱會

日期：9月8日（星期日）
【遮打花園集會】
時間：下午1時30分至6時30分
地點：中環遮打花園

【遊行往美領館】
時間：下午2時半起
地點：美國駐港澳總領事館
-----------------------------
【撐學生】
召集有心人 撐學生全年睇《蘋果》
立即按此