跳水皇后伏明霞自從嫁咗人做少奶奶之後，真係脫離咗運動界，仲連亞運邊度有得睇都唔知！
佢同老公前財爺梁錦松一手成立嘅慈善團體「小母牛」，專以送贈牲畜嘅方式幫助內地貧窮農戶。噚日伏明霞單人匹馬去銅鑼灣一間手袋店舉行「聖誕愛心小母牛義賣」籌款，八方問佢會唔會睇吓亞運跳水？佢竟然問：「邊度有得睇？」
佢師妹郭晶晶即將上場比賽，問佢覺得自己跳水同郭晶晶點比較，伏明霞就道出幾分心聲。佢話：「唔會大家比，跳水係一個好個人嘅項目，大家都係為中國爭光。其實爭取一個亞運冠軍唔難，保持好成績就難喇，因為慢慢你就會有心理負擔，還有變成老隊員嘅身份等。」
至於郭晶晶可能步其後塵，嫁個有錢人做霍家媳婦，伏明霞就唔肯多講，仲表示運動員係冇諗呢方面嘅，只會盡力做好自己。提到屋企同仔女，伏明霞就開心得多，佢話大女四歲，細仔兩歲，兩姊弟間中都會爭吓玩具，由佢同囡囡講道理，反而嗲哋就長期做好人，仲錫個大女多啲。