據社民連提供資料,翻版栢芝名叫林采薇,做緊市場營業代表,芳齡25歲,又係80後。林采薇就話自己花名叫「波波」,坦言第一次去社民連開會時,已經發現只有自己一個女仔,「係比較陽盛陰衰」咁話。
雖然係咁,波波未被嚇窒,因為佢係認同社民連嘅理念先決定入黨。佢仲話,自己已經廿幾歲女,好應該為社會做啲事,「阿牛、毓民付出咁多,見到佢哋可以做到咁多嘢,係咪我哋連少少嘢都唔做呢?所以決定幫吓手。」
社民連栢芝唔止睇得,原來亦有唔少實戰經驗,上次「衝擊中聯辦」事件中,佢都有跟住阿牛去抗議。至於佢會唔會幫新主席手,招攬多啲女仔入黨,佢就坦言有相當難度,因為好多女性朋友都對政治冇乜興趣。八方諗,就算佢招攬唔到女黨員,社民連男黨員人數嚟緊都可能驟升。