社民連領導層噚日大換血，一眾50後全部冇得留低。主席黃毓民卸任前，坦言任內最大遺憾係女黨員太少，成個黨陽剛氣太重。新主席阿陶就任後，帶埋一班新內閣出嚟見傳媒，當中雖然只有一位女將咁大把，但已經令在場傳媒眼前一亮，皆因唔少人都覺得，呢位社民連新行政委員有幾分似藝人張栢芝。

據社民連提供資料，翻版栢芝名叫林采薇，做緊市場營業代表，芳齡25歲，又係80後。林采薇就話自己花名叫「波波」，坦言第一次去社民連開會時，已經發現只有自己一個女仔，「係比較陽盛陰衰」咁話。
雖然係咁，波波未被嚇窒，因為佢係認同社民連嘅理念先決定入黨。佢仲話，自己已經廿幾歲女，好應該為社會做啲事，「阿牛、毓民付出咁多，見到佢哋可以做到咁多嘢，係咪我哋連少少嘢都唔做呢？所以決定幫吓手。」
社民連栢芝唔止睇得，原來亦有唔少實戰經驗，上次「衝擊中聯辦」事件中，佢都有跟住阿牛去抗議。至於佢會唔會幫新主席手，招攬多啲女仔入黨，佢就坦言有相當難度，因為好多女性朋友都對政治冇乜興趣。八方諗，就算佢招攬唔到女黨員，社民連男黨員人數嚟緊都可能驟升。