六四事件19周年遇上中國奧運，支聯會今年提出「同一世界、同一人權、同一夢想、平反六四」新口號，呼籲中國政府主辦合乎人權嘅奧運會之時，亦要平反六四。丹麥行為藝術家高智活（JensGalschiot）發起「橙色運動」，象徵全世界對中國改善人權嘅期望，支聯會今年嘅六四紀念活動亦以橙色為主色，呼籲全世界人睇緊08北京奧運時，亦要繼續監察中國人權狀況，一於畀啲顏色中國政府睇。

平反六四搞新意思

好多人認為支聯會活動墨守成規，所以今年搞新意思，邀請高手設計今年連串活動logo，同時亦印製咗一批T恤同襟章，又有參考福娃造型、象徵「民主、自由、人權、法治、和平」嘅電話繩，同埋橙色膠手帶，希望市民將人權訊息「戴」入生活。
主席華叔聯同長毛等人，噚日喺銅鑼灣擺檔賣紀念品，並收集市民悼念六四死難者簽名，呼籲市民積極參與今年六四晚會，唔好只記住奧運而忘記六四。支聯會常委蔡耀昌話，舉辦奧運係唔少中國人嘅夢想，但平反六四都係大家心願，所以希望中國可以盡早平反六四。支聯會6月1號舉行「愛國民主大遊行」，6月4號晚喺維園舉行六四燭光晚會，不見不散。