恒基主席李兆基媳婦、「千億新抱」徐子淇三年抱兩，舊年懷咗第二胎，佢一直向外講話自己預產期係下個月初。不過，噚日突然有消息傳出，話子淇上星期六（16日）喺恒基旗下嘅沙田仁安醫院生咗，一如預期生咗個女，比預產期早咗兩星期，但家母女仍未出院。
消息話子淇係秘密入院，同生長女李晞彤一樣，揀喺仁安頂樓私家房生產，私隱度十足。記者連日嚟喺仁安醫院守候，但唔見佢或親友出入。恒基公關Bonnie接受查詢時，話子淇應該未生，佢話：「我真係唔知，但我同李生（李家誠）通過電話，佢話：『我都唔知BB幾時出世，如果BB出咗世，我都會通知大家同發相，等大家唔使咁辛勞。』所以應該係未生。」

好友唔爆料

徐子淇好友鄺文珣嘅手機就未能聯絡上，子淇御用化妝師GaryChung都話唔知情，佢話：「我都唔知喎，冇咁快呀？都未收到消息。」不過，如果子淇早產都唔出奇，因為佢一直幫手嘅智行基金，月初搞慈善活動，子淇一早DIY手作袋仔準備現身支持，但最終都臨時缺席。