變身大隻佬苦過弟弟
華仔脹爆膀胱

蘋果日報 2003/10/04 00:00


劉德華在電影《大隻佬》中要黐上超過五十磅的假肌肉,單靠想像已知道相當辛苦,但除了黐肉過程相當艱苦,裝身完畢亦非常難受,就如他裝上假腳肌後,便不能如廁。
劉德華繼在電影《瘦身男女》扮演肥佬,每次拍攝都要在身上黐上數十磅假肥肉之後,他早前拍攝《大隻佬》時,每次又要黐上過五十磅的假肌肉。
別以為華仔已習以為常,他接受訪問時卻苦笑,表示黐上一身假肉不會因有經驗而感到習慣,今次扮大隻佬,每次化妝時間動輒要七小時,是他拍戲以來最辛苦的經驗之一。

需四個人幫忙
原來華仔每次化妝至少要四個人幫手,他首先要戴上泳帽和口罩,及在身上塗抹潤滑劑,以免穿上假肌肉的膠會啜緊皮膚。然後要幾位化妝師分別拉着假肌肉的上下兩端為華仔套上身,在肌肉與手及頸的接駁口上,將接駁位逐層批好,才能上色或穿衣服。
若要全身戴上假肌肉,華仔要先往如廁,因他穿上假腳肌後,就不能上廁所,屆時可謂有苦自己知。若拍吊威吔的戲份,華仔還得吊上威吔才套假肌。
問華仔最辛苦的戲份是甚麼?他說:「我最辛苦嗰次係喺北京拍上山嗰場裸體戲,足足化咗十二個鐘,然後重要剃頭,搞掂晒都成兩點幾。諗住可以開始拍啦,點知重要徒步行成半個鐘上山,成晚冇瞓又要揹住幾十磅嘢行山,我只可以行得好慢。」

票房已過千萬
《大》片上映至昨日共收一千一百多萬,成績理想,華仔說:「票房好、多人睇梗係開心,如果觀眾睇完套戲,明白套戲要帶出嘅意思,明白因果關係,人人都做好人有顆善心,凡事唔好過於執着,咁就重開心。」
採訪:蔡如育
empty
準備變身
empty
四人幫手
empty
套完上身
empty
吊起套肌