聖誕節普天同慶，如果喺呢個佳節做到善事就更加有意義。一班更生人士喺呢個聖誕組成「更生魔法兵團」，今日起至25日聖誕節喺冬季購物節嘅香港冬季玩具博覽會擺檔，除咗將贊助商捐出嘅魔術玩具作慈善義賣，多位啱啱完成培訓、有志投身魔術界嘅更生人士見習魔術師仲會亮相顯身手，近距離向公眾表演魔術。

身為更生魔法慈善籌款活動執行主席嘅黃子彥話，希望呢個活動創造多贏，除咗協助重投社會嘅更生人士提升自尊同自信，以及透過慈善義賣幫到一啲機構，亦想令市民同更生人士實現共融。呢個兵團仲計劃明年初展開連串社區探訪，藉住魔術與眾同樂，以社區為舞臺，展現更生人士才華並服務社會唔同人士。

今次義賣所得收益扣除場租同必須開支後，全數捐助5間戒毒機構，包括愛樂協會、聖公會新念坊、基督教牧愛會、基督教新生協會同基督教信義會天朗中心，以實際行動支持更生服務。