《第三屆澳門國際影展暨頒獎典禮》今晚喺澳門舉行開幕紅地毯，邀請到唔少嘉賓現身，包括周焯華、林曉峰、黃心美、甘國亮、小肥、劉浩龍、陳漢娜、溫碧霞（Irene）、湯怡、何佩瑜等。

作為「明星大使」嘅尼古拉斯基治（Nicolas Cage）同少女時代嘅允兒就壓軸登場，身穿白色閃閃長裙嘅允兒更谷胸現身，更大派福利「烏身」整理裙帶騷事業線，並大晒普通話表示：「很高興參與，希望更多人認識今次電影節，今次來希望多看電影，有機會自己都想參與電影拍攝。」最後更祝願電影節越來越好。

何佩瑜同湯怡兩個同樣穿上白色衣着示人，湯怡就以性感吊帶裙亮相，相反一頭短髮嘅何佩瑜就以中性打扮，湯怡直言今日天氣涼所以凍到震：「你都知女仔愛靚唔愛命，都有諗過貼暖包，不過冇位貼。」

嚟緊聖誕，兩人都分別要為電影開工，其中湯怡表示：「要繼續同陳家樂拍戲，逃避唔到佢魔掌。」講到早前家樂同陳瀅傳緋聞（新聞連結： http://bit.ly/2B0sWQZ ），問到湯怡有冇覺得鬆一口氣？佢話：「都好㗎，我有同家樂傾過，佢同我講單身嘅力量真係唔可以低估，都有叫我小心啲。」咁會唔會想快啲搵番個伴？佢話：「唔會啦，暫時專心工作。」

另外，Irene表示日前到馬來西亞為雜誌影相，大讚當地地方漂亮，可惜因工作緊密未有時間四出遊覽，佢話嚟緊聖誕就可以放假：「都會想去啲陽光海灘嘅地方，咁樣感覺先至夠Relax。」問到係咪同老公二人世界？佢笑言：「係三人世界，仲有啲朋友稍後會Join，我覺得聖誕節要多啲人熱鬧啲先開心。」同場仲有胡兵，透露下月初會起程到倫敦出席時裝週。

精選娛聞，喺晒《娛果》
http://fb.com/appledailyent