阿根廷「野獸」泰維斯去年底為咗高達600萬嘅全球最高周薪，毅然離開母會小保加轉投中超上海申花，被唔少小保加球迷鬧爆反骨仔，但33歲嘅佢屢傳思鄉想離開中超，唔知見到呢一幕會唔會更想走人呢？

雖然小保加要到周三先喺阿根廷甲組聯賽作客奧林普，但佢哋嘅爭標對手班菲特喺周二場波作客聖羅倫素輸0:1，賽後29戰得54分，餘下一場秩序落後小保加5分，肯定無法從後追上，令小保加大軍食住花生已經袋走第32次聯賽冠軍，向死敵河床嘅36次邁進一步！其實泰維斯離隊前上陣11場射入5球，絕對有功勞架，唔知冠軍獎牌或者勝利巡遊預唔預埋佢呢？