開講有話,阿女係老竇前世情人,阿譚對囡囡亦特別照顧,全程拖到實。阿譚同仔女先去無印良品睇零食、文具等貨品,阿譚差唔多六呎高,要同囡囡溝通,不惜踎低身就番囡囡高度一齊傾偈,最後幫阿囡揀咗對襪仔後離開。Tamia可能行得耐扭計要抱,阿譚二話不說抱起囡囡,未知Tamia係咪太興奮腳揈揈,唔小心將一隻鞋仔跌咗落地,好彩外傭好快發現幫Tamia着番。行經玩具店時,阿譚見Daniel眼都唔眨望住美國隊長嘅盾牌玩具,好爸爸見阿仔咁鍾意,亦好爽快買咗件玩具送畀囝囝。
仔女都有禮物,話晒係自己生日,原來阿譚一早幫自己訂咗個大蛋糕,估計老婆已經喺屋企準備緊大餐,一齊開生日派對。臨離開前,Daniel同Tamia又想買嘢飲,但由於司機已揸車到達,阿譚即唔畀買,趕快叫佢哋上車離開。
採訪、攝影:李志明、潘冠恩