今晚澳門舉行國際群星籃球對抗賽，球星姚明、GaryPayton下晝出席記者會，有份比賽嘅方力申、張繼聰、關楚耀變晒fans，全部要岳高頭望球星，關楚耀仲話緊張到幾晚瞓唔著，希望可以入到幾分波。

小方仲帶埋家人嚟到捧場，但女友鄧麗欣就冇到，小方自嘲話：「佢知我實力費事嚟睇。」台灣型男高以翔就畀女圍，大受現場女工作人員歡迎。

最後賽果係74對70，香港藝人加前NBA贏咗姚明嗰隊，球星GaryPayton本來係小方嗰隊教練，完場前15分佢要趕飛機走，由王敏德做代教練，港台5位藝人只罰球線得分，關楚耀得3分，高以翔1分，其他藝人零分。

藝人問球星攞簽名，前NBA球星HoracGrant除波鞋簽名，送畀張繼聰個囝囝張瞻，老婆謝安琪亦都現身捧場，關楚耀亦搵NBA球星喺自己波鞋上簽名。中場表演時，張瞻、王敏德、黃鴻升扮障礙物畀球星跨過入樽，望落好驚險。