港股櫥窗粉飾效應縱然未完，但在長假期氣氛未過之下，昨日成交之低委真不堪入目。大市低開後回升，上升144點收市，報14328，大市成交縮減至僅得219億元，不但係今年以來新低（全日計），更係06年8月以來最低。
滙控（005）逆市下跌，收73.50元，近期市場不利傳聞頗多，由於受傳聞困擾，估計短線該股走勢偏軟，亦會限制大市升幅。預計港股要等元旦假後，市場人士才會重新「埋位」，到時市場若掀起「一月效應」憧憬，可能有一番新氣象，否則可以提早諗定農曆新年有乜節目。
講起傳聞，有傳媒報道玖龍紙業（2689）及掌舵人申請破產，該公司即時澄清，指集團並無涉及任何破產、清算或清盤程序，公司財務狀況健全，業務正常。玖龍股價昨跌3.9%，收報2.20元。

理文造紙只宜低吸

紙業股呢輪新聞多多，玖龍之外，另一隻理文造紙（2314）早排廠房遇上火災，之前又被傳遭追債，霎時間整個行業好似被陰霾籠罩，嚇到好多人都唔敢炒紙業股，但偏偏那個時候，股價卻見底回升，延續至今。
理文造紙半年業績微跌7%，純利6.68億元，算係比預期中略好，但經濟前景不樂觀，始終打擊紙業股，建議待股價回落至3元水平才考慮。
方星俠