今期跑馬地煞科夜賽，下半場（第五場及以後）充滿暗湧，覺得唔易玩，決定在上半場快快趣來個了斷，重心對象竟是田泰安、柏寶座騎，唔理是禍是福，也無怨！

第一場四班1000米：水準低，季內識贏的只有「海之濤」、「喜菜」，加兩匹五班頭馬「欖球鑽石」及「跑馬仔」而已。另一特色是前段有足夠要搶放馬，為「喜菜」帶來爭取季內第二Win黃金機會，大前仗有揀中牠，也不止一次強調這馬衝力好短，排外檔會大打折扣，近兩仗便因此而蝕唔起，接連輸近，證明狀態無回落，臨唞暑仍試閘，爭勝決心大到暈，操法一如「快閃的」，分明想再搏，抽四檔應好跑，只要田泰安有合理發揮，今次絕對可望再起菜。

同場「海之濤」是路程專家，六月初停操一周，睇埋門試跑走勢，覺得對其稍有影響，靠老本，且看可否入一席。「加州勇將」能力平凡，靠一檔、郭能及對手水，尚有望首度前兩名。「創意寶」向來1000好過1200米，鄭俊偉未夠數，排三檔可兼顧。「快馬奔馳」靠追輸蝕。「輕彈錢暢」跑兩場都無野睇。「欖球鑽石」對上一次在四班上名，已是上季初。「跑馬仔」外檔早段用力，亦覺難。