毛舜筠、惠英紅、蕭芳芳及陳嘉寶等，今日喺金鐘出席活動，會上施南生以護苗基金副主席身份接受雜誌捐贈俾基金嘅善款。

剛憑電影《黃金花》榮升亞太影后嘅毛舜筠（相關新聞： https://bit.ly/2wGmfCn ），接受訪問時被問到冇親身去領獎，會唔會有啲美中不足，佢話：「收請柬時知道係要頒獎俾最佳女主角，一早就推咗，因為知道要陪阿女去加拿大入大學，呢個任務好重要，呂哥（呂良偉）講咗攞到會上台幫我攞。」

毛姐話講嘅時候冇消化呂哥講嘅嘢，亦冇諗過會贏，因為有新戲搞緊，又要搞個女入學，實在太忙，搞到啲時間好混亂。而後來知道肯定入圍後，頒獎禮1號就剛剛係阿女開學日，佢話：「因為時差，一早起咗身等阿女起身，諗亞太都係同一日，電話好靜，諗住唔得，原來應該係未公佈。之後有粉絲喺facebook講起，問人又冇人講，問前經理人Helen，佢俾咗份55屆嘅賽果我…今次應該係58屆，後來佢答返我話『攞到喇』，之後收到好多朋友短訊，好開心。」

問到假如照原完計劃頒獎，豈不是自己頒俾自己？毛姐解釋如果有提名，就會轉頒最佳男主角。毛姐話個獎依家係呂哥度未到手，請食飯就一定要，佢話：「金像獎之後已經不停食，要安排一下。依家拍緊一套歌舞片，拍完定一定計劃點慶祝。呢套戲突破因為要分飾4至5個角色，同好多人合作。」

因為前經理人Helen話身體應付唔到，毛姐亦唔想一直支持自己嘅老友咁辛勞，所以佢早前就同英皇簽咗經理人合約，講到合約年期，毛姐都話係短短哋：「識咗楊受成先生好耐，知道佢會尊重我，接想接拍嘅戲。其實都唔算好大變遷，只係入咗大家庭，唔會變搖錢樹，有好大自由度。」

精選娛聞，喺晒《娛果》
http://fb.com/appledailyent