首部內地劇就錄得過億點擊率，令周麗淇（Niki）喺內地人氣急升，即時獲不少片商垂青同商演邀請，今日佢著住條大露背兼側身透視裙，同埋黃芷晴、姜麗文、陳嘉賓及蔡穎恩參與手袋品牌FURLA喺中環舉行預展。

愛情事業兩得意，Niki笑指如果過億點擊係錢就好，佢透露近期內地工作量的確多咗，而香港就冇太大變化，手頭上有幾個劇本傾緊，佢話:「幾個劇本角色都相近，都係演外國返，比較高貴，靚同受過高等教育。」至於片酬會否增加，佢指內地片商會自動調整至合理價錢，片酬係好合理同滿意。

喺內地發展順利，問佢有冇諗過順便北上嫁人？佢笑住話:「未知嫁去邊，佢（男友徐正曦）都嚟咗香港住，都成個香港人咁。」Niki諗過喺上海置業，因為父母都係上海人，對上海有情意結，至於會否搬上內地住，佢就覺得香港始終係佢出生地，暫時都想住香港。至於事業起飛，會否影響人生大計，佢就話:「我人生冇乜大計，幾時結婚生仔都冇乜計劃，其實工作幾時都有得做，可能有日感覺到想做（結婚）咪做。」佢同時指男友係好有計劃嘅人，喺香港亦有物業，問到男友同佢講到人生計劃去到邊度時？佢就甜笑話:「唔講你知。」不過佢就唔介意男友買樓送畀佢。

同場芷晴指媽咪不時灌輸佢時裝知識，又會借名牌手袋佢襯衫，嚟緊佢會同一個品牌合作設計服飾同文具，之後又會同周柏豪去廣州為自己首部電影《販賣愛》做分享會，問到會否叫男友包場支持？佢話:「唔知佢想唔想睇我咁大個頭喺螢幕，到時會叫晒朋友家人嚟睇。」