睇完柏雷素爾主場，堆填區孖寶去咗旁邊嘅訓練基地，等一班柏軍球員練完波出嚟。聽日會喺聯賽硬撼浦和紅鑽嘅柏雷素爾，今日閉門操練，記者都唔畀入去睇，但仍然仲有數十名球迷等球員練完波出嚟簽名。
孖寶有幸搵到球隊總監吉田達磨做訪問，由於之前柏雷素爾有機亞冠外遇本港勁旅傑志，孖寶就問吉田有冇起過傑志底，佢果然有做功課，知道傑志以控球組織為主，似歐洲球會踢法。不過，問到有冇邊位球員佢特別有印象，佢初頭話冇，之後先講有個西班牙球員幾好，但連號碼同位置都答唔出。