記者發現，酒家在龜池旁貼有「小心咬人」警告，但並不顯眼。一呎高的水池僅達3、4歲小孩膝蓋高度，小朋友彎腰即及。晚市時間，有不少小孩駐足看龜，其間未見職員上前勸阻。帶兩歲兒子看龜的潘太坦言：「吓？隻龜咁恐怖！我見唔到有告示，佢哋真係要做好啲預防措施，小朋友俾佢咬到，冇咗隻手指就大件事！」
海洋公園爬行類動物專家楊月媚指：「曾聽聞有case連掃帚棍都咬斷！」養鱷魚龜多年的寵物店負責人阿文則說，鱷魚龜必須以網隔離，家中有小孩者更絕不適宜飼養。阿文說，鱷魚龜無論是平背還是凸背，皆是肉食動物，具攻擊性，而平背鱷魚龜習慣主動獵食，故更危險。他說：「佢哋個嘴好似鷹咁，同利刀冇分別，養呢種攻擊性動物要好小心，要獨立飼養，一定要有防護蓋，仲要鎖住，小朋友不宜接觸，佢一啖就可以咬斷小朋友手指，我餵佢都要用兩呎長鉗夾畀佢食！」
記者要求阿文示範餵龜，其中一隻巨型凸背鱷魚龜一口就吞沒7吋長鰂魚。阿文之後找來一隻較細的平背鱷魚龜作測試，將一條甘筍放在其嘴前，只見該龜原本沒有動靜，但突然以快如閃電的速度伸長頸部，張口噬了一口，甘筍條留下狗牙狀咬痕，其動作的敏捷與其走動速度完全是兩回事。