今時今日，當大家去連鎖快餐店食個廿蚊早餐，已經大叫超值，就會明白點解本地飲食股股價可以升得咁勁！
翠華控股（1314）舊年11月，以2.27元在香港掛牌，一度升至4.46元，唔使半年股價已經翻一番，昨平收3.95元。再睇同行對手，大家樂（341）走勢相當凌厲，昨日創歷史新高，收報24.25元；大快活（052）都蠢蠢欲動，想挑戰破頂關口，收報16.48元。
再睇業績，雖然間間快餐店、茶餐廳，成日都呻香港租金貴、食材漲價，工資成本又高。不過翻查紀錄，翠華截至去年9月底止六個月業績，盈利增加差唔多四成，達到6,478萬元。大家樂同大快活都齊齊有錢賺，分別多賺16%及10%，達到2.21億元及6,401萬元！

無論睇股價定業績，都反映本港飲食業經營環境雖然困難，但其實都有得撈。當中，麥格理就首次發表報告唱好翠華，預計今後三個財年，純利增長一樣咁強勁，分別達45%、36%及26%，遠遠跑贏同業。單計店舖回本期，翠華只需要一年，快過行業平均兩三年多多聲，股本回報率料維持50%以上。
除此之外，翠華不論在中港兩地都有很大發展空間，該行估計，2015年財年度，翠華內地收入貢獻將會由17%，升至41%，故看好股價可升至4.90元。

瑪姬兒