榮盛科技（1166）成年冇郁過。呢隻滄海遺珠嘅超低PE兼大折讓因素，起碼有權翻半番。榮盛主打電線、電纜、接插件同聯接線產銷。07年度中期（12月止），榮盛純利已接近翻半番到3356萬銀。好保守計數，當榮盛全年度純利增長減半，只得25%，純利上9858萬銀，PE都係低企4字頭。
又榮盛半年營業額已經講緊17億銀，營收晒士唔係嘢少。榮盛毛利率只要有1至2%改善空間，毛利分分鐘又多2、3000萬銀，到時，榮盛PE仲吸引。而17億銀收入中，佔咗70%（12億銀）係嚟自祖國市場，榮盛ChinaConcept一樣強到爆。再講，榮盛NAV1.98元，現價（0.84元）折讓57%，當炒折讓，一樣吸引。
榮盛股東當中，包括名牌基金Stark同Penta，大雞斷估唔食細米。榮盛翻半番到1.29元，預期PE都係6倍，就算翻一番到1.72元，PE都係8倍單位數。

德祥動作多惹聯想

德祥（372）4月EGM通過可能出售保華（498）部份權益，呢壇製作，估計套現最高8.3億銀，獲利3.13億銀，相等德祥每股賺0.16元，現價0.67元折合PE4倍。連埋呢項潛在出售計數，德祥NAV上到1.3元，折讓48%，算係吸引。再講，德祥呢個月9號，先沽出錦興（275）2100萬股，套現1.05億銀，若果成功出售保華權益，德祥手頭多咗9億銀。德祥儲定咁多銀彈，搞邊科未知道，但肯定引發多多聯想。博殼王繼續爆棚，呢注買入，起碼博德祥見NAV1.3元。
錢雋