護級唔係大過天，今晚重心博英超「南北孖寶」修咸頓同紐卡素坐和望贏。
「狐狸」李斯特城四連勝暫逃離降班區後，周中剛被「冠軍車」終止走勢，賽前李城話留力，好等今晚早場全力招呼現時成個聯賽最頹嘅北軍紐卡素；但從比賽嘅排陣同「用力」程度，狐狸留唔住。早段兩位主力中堅侯夫及10號仔安迪京治傷出，加埋喺領先下戰至後段先被車仔反勝，周中呢場波算係慘輸。

狐狸兵疲　黑貓防守差

李城早前四連勝中入了八球，對手唔係實力一般就係戰意有疑點，球隊勝在踢法直接，一鼓作氣；「病壞」侯夫喺四連捷中表現神勇，場場踢足兼有士哥，安迪京治更有兩球進賬，兩人今場勢缺陣打擊唔細。另外休息只有兩天多就要喺今晚早場亮相，對一眾啱啱踢足全場嘅「三字頭」老將，包括甘比亞素、高捷斯基及韋斯摩根等，難頂。李城迎戰七連敗嘅紐記開出讓平/半超低水，提防莊家請君入甕。
紐記現時有35分，暫代領隊卡華話要季尾多取四分保命。佢哋嘅名宿舒利亞狠批，班波一團糟兼得失球唔好，護級未必穩陣；另一名宿奧雲預測佢哋可能一路輸落去。另外卡華上仗仲俾擁躉侮辱、肥佬班主艾殊利被插經營不善，紐記𠵱家逢人都識插。
細心睇，紐記長輸中，除咗0:1敗走新特蘭外，其餘皆係積分榜上半版嘅好手；上仗主場僅負史雲斯2:3見有起色，係自一月尾後首次喺聯賽入多過一球，更慶幸久休嘅射手施安迪莊後備上陣即入波。今場作客「狐狸」更有穆沙施素高復出，爭勝機會提高。眾高薪兵識諗，唔會係為兩個「肥佬」卡華同艾殊利而戰，係球會一旦降班，球員身價必大跌；外界今戰一致看淡，反可小試客W。
再選，必取爭歐霸位有決心嘅南軍修咸頓，遠征「黑貓」新特蘭成功。黑貓話緊張護級，但近10戰聯賽只曾險勝紐卡素，縱季中重簽射手迪科爾加盟，但後防缺口難補。修頓上仗果然讓唔起同級嘅熱刺，但箭頭加斯安奴柏利回勇，又有中場重將雲耶馬停賽復出，少讓平/半，上盤佳選。
周日大戰，博熱刺抵得住跌watt月亮曼城；波膽則取休息期足夠、上仗被車仔悶親嘅阿仙奴，喺下周一晚打「虎」成功。
波神
神級攻略 智破足彩