通常一班親戚食飯都係分兩派，一邊係「認叻派」，一邊係「認低威派」。康仔好不幸，大部份親戚都鍾意認屎認屁，撞正康仔老母係「認低威派」中堅份子，所以每次食完飯返屋企都梗有說話聽⋯⋯

「你睇吓表弟，讀law呀人哋，你就讀屎片！」

「阿三叔婆個仔份糧少過你，人哋而家買樓呀，你啲錢洗晒去邊呀？」

咁多年嚟，康仔已經聽到麻木，慶幸表妹同康仔一樣都係廢青，「廢柴同盟」總算唔太孤單。直至早幾年嘅一餐團年飯，康仔見到最精彩嘅一幕。表哥鍾仔向來係一班親戚入面嘅模範，因為佢阿媽、即係我姨媽次次見面都會讚到個仔飛天，呢一年就讚鍾仔係溝女專家！

「你哋幾隻嘢有冇拍拖呀？記住唔好縱壞女朋友呀，我個鍾仔從來唔會送女朋友返屋企，從來唔會送禮物，食飯一定AA制。你哋都睇到喇，佢女友阿恩一樣小鳥依人⋯⋯（下刪一萬字）」

正當一班姨媽姑姐準備對呢番偉論拍手掌嘅時候，康仔個表妹竟然咁唔識死玩踢爆⋯⋯

「唔係喎，上次我喺尖沙咀見到表哥買Gucci畀阿恩喎！」

一句說話，全場靜晒。康仔覺得表妹呢鋪爆響口，同喺長輩面前講粗口一樣咁難聽，但喺隔離食花生嘅我梗係暗爽yeah晒喇！查實唔送嘢畀女朋友、唔送女朋友返屋企同埋食飯AA制，真係咁威？

康仔明白，拍拖洗費一定有，氹吓女友開心都好應份。如果連拍拖階段都唔付出、咁計較，點叫個女人跟你一世呀？

不過洗錢還洗錢，記住量力而為，如果當拍拖變成財政負擔就好唔健康，充大頭、送大禮、餐餐大魚大肉咁就李嘉誠都牙痛咁聲啦。互相了解對方財力，搵個最舒服嘅相處模式，咁樣一段關係先至會長久。

專欄作者簡介：
康仔
日頭返工攤抖，例牌遲到早走，收工約Friend飲酒，放假陪女玩狗。
一日冗員，一世冗員，我是康仔。

Facebook專頁：

https://www.facebook.com/mynameishonghong/  

發掘更多身邊的小城故事，請LIKE 蘋地Facebook Page，並設定為「搶先看」： https://www.facebook.com/appledailyland/