最近榮升做「宅男女神」嘅孫慧雪，今年趁住入行10周年，推出處女寫真集《Once》，實行以33C半裸寫真力撼一眾o靚模！

緋聞多多嘅阿雪，一直有指佢有一個拍咗拖近4年嘅圈外男友EdwinLo，但係亦有話佢同化妝品牌老闆楊振源頻頻約會，但係阿雪日前出席活動，佢自己dry咗半年，仲話自己有一顆恨嫁的心，想搵個人錫佢、錫佢屋企人而且夾得嚟嘅人，不過依家都冇人追。

不過噚日有讀者向本報報料，話阿雪同EdwinLo查實仲未分手，佢哋兩個人喺港島東區同居，喺今年5月仲一齊去咗泰國旅行，讀者仲話因為Edwin屋企有錢加上又錫阿雪，所以佢一直都唔肯放手，但係唔抗拒其他男人追求，實行一腳踏幾船。

阿雪接受傳媒訪問，講到o依家感情狀況，佢話：「咁搞笑？感情嘅嘢我唔講喇，我呢排啲工作好忙，冇乜自己嘅生活，唔得閒諗呢啲嘢，o依家以工作為重。」問到佢同Edwin係咪拍過拖？阿雪就話：「我唔想講感情生活，加上佢又唔係圈內人，我唔想影響佢同佢屋企人嘅生活，所以冇乜嘢好講，總之多謝大家關心。」