主唱《Right Here Waiting》、現年53歲嘅80年代美國情歌王子Richard Marx，日前同老婆Daisy去完越南，搭大韓航空去首爾轉機返洛杉磯其間，喺機上遇上一名韓國男子醉酒鬧事，襲擊空姐同乘客，狂踢空姐同吐口水。空姐同機組人員想用繩綁實佢，但係又綁唔實，男子掙脫咗3次，擾攘咗成4個鐘。坐喺附近嘅Richard見空姐咁狼狽，就親自出馬，同其他乘客一齊綁住男子先搞得掂。飛機降落後韓國警方上機拘捕該男子。

Richard事後於facebook講述事發經過，佢話：「我同老婆都安全，但一名機組人員及兩名乘客受傷。所有空姐都唔識點應付場面，佢哋冇受過訓練去學點制服個癲佬。」Richard表示大韓航空應該受罰，因為機組人員唔識點控制場面，搞到要乘客幫手。Daisy亦於Instagram指空姐唔識用電槍。