西甲班霸巴塞隆拿想買菲臘比古天奴呢單嘢就係人都知，而且佢哋成日都出口術，荷西保連奴、恩尼斯達間唔中講下嘢，叫古仔去巴塞。近日有西班牙傳媒放風，話古仔已經托人去巴塞搵樓，似乎轉會已成定局。

《世界體育報》話，巴塞將會喺一月再次出價收購古仔，而古仔已經托人喺巴塞搵樓。報道仲話，古仔想住喺前隊友蘇亞雷斯同埋同鄉荷西保連奴附近，等佢可以快啲融入西班牙嘅生活。

但利物浦球迷唔使咁驚，因為《世界體育報》嘅總部係喺巴塞隆拿，話唔定佢哋夾埋巴塞出口術，想以輿論攻勢逼古仔離隊!

----------------
BFB CHAMPIONS 2.0 聖誕新年活動連環出擊，登入即送傳奇球星「林伯特」！ http://bit.ly/2xrTKGM