憑韓國選秀節目《PRODUCE 101》而出道嘅限定人氣男團Wanna One，早前展開世界巡迴演唱會《ONE：THE WORLD》，下月28及29號更會嚟到香港開騷。

之前門票公開發售即時掀起搶購熱，而今次亞博方面仲採取實名購票，杜絕黃牛。不過近日有粉絲就喺網上作出投訴，指購票時系統出現問題，雖然成功過數，但卻無法確認門票，其他粉絲又指購票成功後發現門票消息，令佢哋好擔心，又質疑主辦有超售情況。

而亞博方面亦於網站及Facebook交代事件，並透過網上購票系統懷疑遭到惡意攻擊，導致部份座位編配出現問題，佢哋更已經向警方備案，同時又表示：「據了解，供應商客戶服務部已主動聯絡受影響人士，處理全數退款事宜。亞博館同時要求供應商在條款以外，以客戶為先，除了退款，亦可酌情安排同區或就近區域門票，並退還票價差額，及準備用作購買演唱會紀念品的現金劵，給予同意接受新座位編配人士，以表歉意。」

對於今次採用實名制，網上曾指可以申請轉名，不過亞博方面就重申所有門票唔接受轉名，門票登記姓名必須同持票人身份證明文件完全相同，如果名字不同就會被拒入場，但強調深明大家仍需時間適應實名購票，所以就今次演唱會將會酌情處理有關改名申請個案。

亞博facebook連結： https://bit.ly/2tlsj1p

更多韓流，喺晒《娛果》
http://fb.com/appledailyent