二十歲的貧苦學生黃振誠做跟車送貨暑期工，只為賺取來年的學費，幫補生計，詎料遇上車禍身亡；黃家苦於無力葬兒。二十歲患有深度弱聽的李菁，沒錢購買助聽器，助其學習需要。兩個貧窮家庭，幸獲讀者雪中送炭，慷慨捐款，紓緩他們沉重的經濟壓力。

「𠵱家情緒都時好時壞，始終未放得低個仔嘅死，夜晚要靠食藥先瞓到覺，喺屋企盡量搵多啲嘢做，希望唔好諗咁多；其實，我哋都冇諗過會收到捐款，暫時會儲起佢先，希望將來用嚟供個女升讀大學，達成阿哥未完成嘅心願。」現距次子阿誠去世已有一個多月，惟黃母至今仍未能平復悲慟的心情。

「將來幫番有需要嘅人」
四十五歲的她與五十五歲丈夫結婚二十多年，育有三名兒女，二十二歲的長子今年大學畢業，剛找到一份文員工作，而十一歲的幼女則就讀小六。黃家五口的生活開支全落在酒樓任職點心師傅的黃父身上，月入約一萬多元，僅足餬口。
在商科學院就讀電腦課程的次子阿誠，為了賺錢繳付來年的學費，助減輕家庭的經濟負擔，已是第三年重返製冰工廠做暑期工，跟車送貨。詎料飛來橫禍，他車禍身亡。惟黃家無力辦殮葬，蘋果日報慈善基金早前從「殮葬專戶」撥款一萬元，助其殮葬兒子。近日，另接獲讀者捐款四萬五千三百三十元，助紓緩經濟壓力。
「香港人真係好有人情味，希望將來環境好啲嘅時候，會用個仔嘅名義捐錢去幫番社會上有需要嘅人。」黃母感激地說。捐款編號：C0672

就讀大學二年級的阿菁，自一歲半時因為發高燒，得不到適當的醫治，導致嚴重失聰，需要佩戴助聽器。早前，她遺失了耳機，急需購買價值一萬多元的助聽器，助其學習及日常溝通。惟任職保安員的李父，月入約五千多元，實無力繳付有關費用。經報道後，本報即接獲讀者捐助她購買價值一萬六千多元的全數碼助聽器。另續接獲讀者捐款二萬六千七百一十九元，令他們的生活得以改善。

學生獲捐款購助聽器
「重有咁多讀者幫助我哋，真係好感激，為咗應付阿菁嘅讀書同埋生活費用，我同佢申請緊其他獎學金，希望可以幫輕吓屋企開支，𠵱家收到呢筆捐款，真係減輕咗好多負擔，我會將啲錢全部用喺佢嘅學習方面。」五十一歲的李父由衷地說。
在父親身旁的阿菁得悉再次接獲讀者的慷慨捐款時，她坦言：「我哋大家唔相識，但仍然有咁多讀者對我無條件嘅付出，真係好感動，以後我會畀心機生活同埋讀書。」她續說：「𠵱家戴咗部新嘅耳機，上堂可以清楚聽到老師講嘢，對於我學習真係幫咗好多！」捐款編號：C0621

暖流熱線
電話:29908688
傳真:23702192
電郵:[email protected]
網址： http://www.charity.atnext.com