放完幾日新年假，好多打工仔都喺噚日年初四復工。早前有傳滙豐個別部門員工發起初四集體「射波」行動，呼籲同僚齊齊喺噚日請病假，抗議公司盛傳喺新正頭裁員；結果facebook「滙豐銀行初四（26/1）罷工行動」專頁，噚日上載咗一張辦公室內十凳九空嘅圖片，發起人留言話「多謝支持」，暗示有員工請病假聲援，但有人就留言質疑張相堅定流，反問唔畀張相喺食晏時間影㗎？原來，有圖未必有真相。

由於嗰張相冇講到幾時影同埋喺邊度影，令到網友疑團多多。八方索性直接打畀滙豐老友，打探吓覺唔覺得有大批同事響應運動請病假？答案喺唔多覺。佢仲話辦公室十分熱鬧，運作如常，有高層仲好抵死咁搞爛gag笑笑口問：今日有冇人請病假呀？
八方都喺網上各大討論區搜索，發現都有網民話攞咗病假參與行動；但就有更多人話嘥氣，「出師無名，有鬼用？sick完都冇人知為呢啲嘢啦」；尤其長假期後特別多人「射波」回魂，鬼知你係抗議裁員定係自己未嘆夠？有網民就感嘆香港打工仔唔夠團結，點解任公司魚肉都唔出聲？

為咗證實「射波」運動係咪成功，八方都嘗試打畀滙豐，查詢噚日請假人數，可惜截稿前都冇回覆。到底喺咪真係有罷工？真喺得滙豐員工自己先知，但員工最開心嘅，莫過於截至噚日為止，都未收到滙豐裁員嘅最新「傷亡報告」，唔會喺龍年第一日開工就有噩耗。
mailto:[email protected]