近年唔少年輕人去工作假期,打工遊學放眼世界。港台數碼台食住呢股熱潮,喺節目《遊學全世界》加入新環節「領事系列」,搵全港總領事化身導遊,分享佢哋國家嘅遊學資訊,例如講吓必到景點,萬勿錯過嘅節日體驗等。
港台噚日為新環節舉行啟動禮,逾卅個領事應邀出席,一人一句介紹各國嘅重要節日同活動等。但八方搵勻全場,就唔見英、美、日等國嘅總領事喎,莫非政改關鍵期間,佢哋為免開腔評政改惹中方不悅?港台解釋,佢哋就唔啱時間,但美、日總領事都應承做節目,英國總領事就聯絡緊。而噚日有現身嘅德國駐港總領事蘭布斯多夫(Nikolaus Graf Lambsdorff,圖),佢佔領期間講過港人應以年輕一代為榮,但噚日再被問到香港政改即三緘其口,只風花雪月話新年會去吉隆坡玩喎。