【新增內容】
日本人氣組合Morning娘嘅13名成員噚日首次襲港，今日喺九展Star Hall舉行演唱會，雖然噚日日本方面就驚爆日本偶像組合櫸坂46舉行嘅握手會上，有男粉絲喺現場放信號彈兼計劃刺殺16歲成員平手友梨奈，但今日九展現場就唔見有特別加強保安。

Morning娘原定今日下午6時開騷，佢哋比原定時間遲咗約10分鐘先出場，有約八成入座率，當中除本地粉絲撐場外，亦有唔少來自日本嘅粉絲飛到現場支持。

Morning娘着上同噚日現身銅鑼灣皇室堡記者會時一樣嘅紅裙示人，當佢哋獻唱第一首歌《Brand New Morning》時，全場粉絲已經high爆，仲舉起手上嘅七彩螢光棒。Morning娘好鬼落力，又唱又跳兼fing埋大旗，炒熱全場。

到獻唱第三首歌《Songs》時，Morning娘就玩台上換衫，即時除掉外面嘅裙，變成背心top及短裙，雖然着住短裙仔，但佢哋跳舞時依舊做出踢腳動作，好在裙入面有着打底褲，所以佢哋都唔擔心春光乍洩，隊長譜久村里同另一成員仲整甩頭飾。

Morning娘落力演出，隊長譜久村聖勁出汗，跳到全身濕透。唱完五首歌後，Morning娘就用廣東話冧港迷，隊長用廣東話講：「香港嘅朋友大家好，我哋係Morning娘。」不過隊長就講得唔係太正，之後每個成員都輪住用廣東話介紹自己，但講到歪晒音唔似廣東話，反而講得最清楚應該係阿由美。隊長自我介紹時要講幾次先成功，之後好努力咁繼續講，但粉絲似乎完全聽唔明，所以搞到冇乜反應。

其他成員就坦言廣東話好難學，並以廣東話講：「認識到大家好開心」，然後隊長話0依家再唱歌，之後再次用廣東話講：「大家一齊開心。」然後佢哋準備抽獎將簽名poster送畀歌迷，合共13張，所以每位成員就輪住抽。成員提及佢哋開騷前做拜神儀式，切燒豬，由頭切到尾，日本冇試過，所以感覺新鮮。同時又讚香港人好識着衫，簡單又有型。

安哥出場，歌迷戴上自製Morning娘各成員樣嘅紙面具，成員見到都好開心，大讚可愛，多謝晒大家。唱完一首歌就背向觀眾話一齊大合照。到尾聲就由隊長以廣東話讀信，佢話：「今日非常多謝大家嚟睇Morning娘演唱會！其實決定香港演唱會嘅時侯，成員大家非常開心，我地每一位身為早安少女組。成員都感到自豪，由0依家起希望透過歌聲傳送更多愛比世界各地嘅人!各位香港嘅朋友 由0依家起請大家多多支持我哋。」由於唔知大家明唔明，最後隊長用日本再講一次。

快將畢業離隊嘅工藤遙，連同其他成員再出場，佢哋冇用咪用日文講多謝，工藤遙感動落淚。