薄扶林貝沙灣裝成高尚豪宅,宣傳與推廣浪接浪,今次配合第六座即將開售,盈大首度改為用中國人相信嘅風水做賣點。
樓盤啱啱至攞到測量師學會頒發最佳市場推廣大獎。
成個貝沙灣項目佔地廣闊,盈大話,第三期各座中,第六座面向正南方多啲,合乎普遍買家愛揀坐北向南單位嘅喜好。
發展商噚日專程帶傳媒去到數碼港現址嘅酒店,望住海面嚟講解。
盈大營業經理莊賢文話,第六座景觀廣闊,左面係瀑布灣及火藥洲;對面係索罟灣、鹿洲灣與榕樹灣,而左右兩邊嘅東西博寮海峽,海水好似湧向第六座咁款,堪稱八個荷包聚財之地。
其實,係咪風水格局影響就見仁見智,但係貝沙灣第一期買家,喺近一年多樓市升浪中,荷包就肯定脹咗。
嘉亨灣搶領匯客
上個禮拜,西灣河嘉亨灣推出租金回報保證計劃,恒基營業部助理總經理林達民聲稱,回報高過啱啱開始認購嘅領匯多多聲。
為咗令大家更了解呢個產品,佢噚日喺中原記者會上客串做講師,好認真咁準備定箱頭筆同埋臨時黑板,利用簡單嘅方程式講解,邊寫邊解釋,講師形象入型入格,幾可亂真。
佢嘅計法係,買家畀一成首期,每年就有五厘回報,扣埋利息支出都有兩厘半,相對投入嘅資金,回報有兩成半。林達民話,比起其他投資工具,好似剛開始招股嘅領匯,一年都係得六七厘回報,嘉亨灣實高過佢。而且,領匯重好多人爭,分唔到幾多,嘉亨灣就有貨畀買家任揀,梗係吸引啲。