「拉闊思念永恆的陳百強」音樂會明晚開騷，噚晚陳奕迅（Eason）同千嬅、梁詠琪(GiGi)等齊齊綵排，仲搞到千嬅笑唔停。

早前Eason開個唱，喺台上鬧爆fans唔尊重歌手亂嘈亂嗌，甚至用手機代替耳朵聽歌。噚晚問Eason，聽晚開騷時使唔使同觀眾約法三章、請佢哋靜啲？Eason話： 「唔使，之前睇盧凱彤騷，同自己騷完全相反，我份人有位講嘢、想分享感受，大家唔使對我咁認真，有啲嘢get到就get。每人做騷唔同，好小事，大家唔使太在意。」

GiGi就打趣謂，結婚之後，先至發現Eason唔係吹水王： 「我老公(Sergio)仲勁過佢，有時我收工返到去，不停同我講嘢，訓練我口才好咗，口水多過以前好多。」

此外，早前有報道話，劉浩龍請假陪祖兒去美國受訓準備迎接個唱，有指因為機票唔平，祖兒擔心男友有經濟壓力，但又唔好意思幫佢付俾，於是提出用飛行里數換機票。噚晚問番張敬軒，佢話： 「我唔信，佢哋經濟獨立，生活上眼見師兄照顧祖兒多啲，報道唔公平，佢哋選擇公開想多空間拍拖。」