今年初在布吉結婚的沈卓盈，做了人妻快一年，她笑言自己是「多功能老婆」，盡力把老公杜灝標（Calvin）照顧得妥貼，他們這個兩口之家沒有聘用外傭，所以家務會分工合作。

「做咗成年人妻，好充實，以前未結婚，我反而有私人空間可以行吓街，而家要照顧家庭，出去係行超級巿場同街巿多咗，自己shopping少咗。」沈卓盈笑言打理一頭家其實很忙碌：「人妻好多嘢做㗎，放假就要執屋，我好鍾意每星期都將啲鞋同雜物執得好乾淨，平日見到啲嘢亂咗又會擺番好，好似拖鞋亂咗，或者老公隨手放件褸，我都會好有手尾將佢擺番入間房度。男仔係隨意啲，但我好執着，堅持要放番好。」

有指兩夫妻婚後會投訴對方的生活小習慣，沈卓盈坦言：「咁又冇乜，兩個人生活好多唔同，彼此要互相遷就。」家務就齊齊做，沈卓盈鍾意執拾，老公Calvin則包辦厭惡的洗廁所，「相比起，我執嘢多啲，不過如果佢冇時間唔得閒，我都會幫手洗廁所㗎，佢做嘅次數多過我啦。有時就我煮飯，佢幫手洗碗。」Calvin娶得沈卓盈這位「多功能老婆」，當然錫到燶，見到老婆辛苦做完家務，他會識做地服侍太太，「佢見我太攰會幫手做，也有同我按摩吓，兩樣都有。」沈卓盈大讚Calvin夠體貼，那會值多少分？「佢算高分，我驚佢驕傲，如果有加有減，100分滿分，我暫時會畀佢90分，有10分進步空間，慢慢加上去。」不過記得年初結婚時，沈卓盈指老公是120分好老公，婚後卻要重新計算。

沈卓盈的生仔計劃是順其自然，她說：「生小朋友都講緣份，要嚟始終要嚟，我哋冇話指明幾時要生要幾多個，到時先算，冇特別諗，總之我哋心態都鍾意小朋友。」沈卓盈表示近日為香港開電視拍節目《五星級絲打》，分享扮靚和美食資訊，她手頭還在斟洽接拍新劇，看來生仔計劃又要暫緩。

今年是沈卓盈升呢人妻後首個聖誕節，加上離開無綫後工作量大增，今年買給親友的聖誕禮物稍為「加碼」，她說：「送禮物係心意，我鍾意揀啲啱用嘅禮物送朋友，就算畀多少少錢，啱用都值得嘅。」沈卓盈早已購了一份實用聖誕禮物給老公Calvin，但未有特別期望收到甚麼，「每年都係我送出多，好少會有回禮，我送嘢畀佢哋，佢哋開心我咪開心。」她自爆試過跟家人交換禮物，收到胞姊的洗潔精和毛巾，「可能我同家姐都好實際，唔想買無謂嘢。」沈卓盈今年聖誕繼續跟家人一齊開P溫馨度過。

撰文：比華利
攝影：Matthew Lam
攝錄：馮嘉銘
場地：RedMR

-----------------------------
【匿名港警爆大鑊】
韓國KBS時事節目《時事直擊：香港 被自殺》
一按即睇
-----------------------------
【撐學生】
召集有心人 撐學生全年睇《蘋果》
立即按此