鄧詠芝、李綺雯、董敏莉、張惠雅、黃天翱（Tim Wong）今日在九展為文恩澄監製執導微電影《親！包郵蜜友可以嗎？》進行開鏡。Tim在戲中飾演好男人，跟佢同楊洛婷甜蜜婚姻好男人一樣，Tim已經準備就緒做爸爸，十分期待。

Tim太太楊洛婷九月底就係預產期，拍攝電影和17號到深圳演唱會係太太生B前最最後工作，Tim話：「擔心緊17號個演唱會，醫生話BB有機會早咗出世，我已經有心理準備，call哂朋友到時邊個可以得閒去醫院就陪住先，自己都唔想錯過呢刻，希望唔好喺演唱會當日生B。」 如果生B同演唱會決擇？Tim話：「我唔敢諗，演唱會嘅時候啲兄弟都可以幫下手頂住先，我計過深圳返落嚟香港一個鐘左右，話生得應該都要等一段時間。」Tim會陪埋太太入產房剪臍帶，若果容許影相佢亦都會拍照，好多男人都驚血淋淋，Tim話：「覺得好正常，我ok嘅。」

早前兩公婆就影咗一輯大肚照，Tim覺得好有美感，太太楊洛婷時常在網上post食物相，又將pizza放到肚上，好為食，Tim話：「依家好多嘢都食得，佢喪喪哋㗎，佢影呢啲相嘅時候我都唔喺佢身邊，不過平時我都有陪佢食嘢，自己盡量唔增磅。」講到囡囡改咗名未？Tim話：「已經有幾個，只可以講其中一個名係會有faith(信念)，其餘就要等太太見到BB出世之後有咩感覺先再算。」

李綺雯首次正式編劇，今日以一個村姑look上陣，原來佢飾演時尚雜誌社編輯，歡迎投資方或老闆找她合作。董敏莉現實生活成為人妻今次再披上嫁衣拍攝， 佢話：「我結婚時冇特別著婚紗，只係著咗條白色裙，我覺得著婚紗好辛苦好重，行動有啲不便。」成為人妻之後赤道真係大不同，件婚紗好密實，董敏莉竟然話：「好性感架喇，好deep V，只係有件紗遮住。」幾時造人生B？佢話：「我仲有條腰，呢啲未諗，順其自然啦。」