每次公司有客到，康仔都會好雀躍，但如果大家以為我想幫公司賺錢同取悅我阿姐，咁未免太睇得起小弟。康仔冇咁上進，只係想透過Speed Dating呢份工滿足一己私慾，接觸唔同類型嘅女仔。

早排康仔就遇到個怕怕醜醜嘅女仔客，由佢頭戴絲帶配超長白襪嘅造型，加上喺張報名form度用日文填自己個名，康仔九成肯定，佢係cosplayer！

「唔好意思，請問你可唔可以填返個中文名？」

「吖，sorry！我叫阿欣呀！」

「阿欣，我會根據你嘅嗜好同性格做配對，當日可唔可以轉一轉look出event？成事機會相信會高啲。」

呢個Table for 6 event喺一間coffee shop舉行，當日阿欣真係轉咗look赴會，咩look呀？係女僕look呀！更意想不到嘅事接連發生，就係當日另一位男仔客突然企起身鞠躬，跟住以近乎咆哮嘅聲線向阿欣講咗句「こんにちは！（Kon Ni Chi Wa）」。

嘩！當時係全間coffee shop靜晒，康仔直情笑到面容扭曲，企都企唔直，就連阿欣都畀呢位男仔嚇一嚇，唔識反應。個男仔客叫阿風，可能佢都知自己over咗，望一望我，然後望一望阿欣，又唔敢坐返低，成個event total 6個人靜晒，康仔霎時間都唔知點收科。

「既然大家都咁崇拜日本文化，實大把嘢傾，不如食啲嘢再慢慢了解對方啦！」

康仔緩和咗現場氣氛之後，大家開始有傾有講，最估唔到嘅，係阿欣同阿風竟然係event入面最啱傾嘅一對，言談間我聽到雙方都拋過吓幾句日文，阿欣仲喺手袋拎咗個唔知咩動漫人物嘅鎖匙扣出嚟，話畀阿風聽：「呢個係我老公！」

Event完咗之後兩個禮拜，阿風同我講佢哋已經開始拍拖。康仔由細到大，都好憎身邊啲friends溝到女，但自從做咗Speed Dating之後，親手撮合到有緣人真係有份滿足感。

老土啲講句，幫人識另一半係開心嘅，祝阿欣同阿風甜甜蜜蜜。諗諗吓，搞個「Cosplay約會」有得諗喎，又係時候向阿姐sell橋！

專欄作者簡介：
康仔
日頭返工攤抖，例牌遲到早走，收工約Friend飲酒，放假陪女玩狗。
一日冗員，一世冗員，我是康仔。

Facebook專頁：
https://www.facebook.com/mynameishonghong/