當大家一心諗住上屆日本馬王「北部玄駒」，可繼勝出新升格做一級賽的大阪盃（2000米）及歷史悠久的春季天皇賞（3200米）後，再在剛周日（25日）順利攻下寶塚紀念賽（2200米），於首屆日本春古馬三冠系列贏晒三關，從而創造歷史。

不過有睇轉播賽嘅都知，結果令人大失所望，「北部玄駒」於日本國寶級騎師武豊胯下，沿途走外叠望空蝕位，最終大敗而回跑第九。

賽後「北部玄駒」馬主北島三郎見到愛駒表現失色，隨即宣佈唔會去法國出戰凱旋門大賽（一級賽2400米），並將目標轉移至日本秋古馬三冠系列。

秋古馬三冠系列由三場一級賽組成，計為秋季天皇賞（2000米）、日本盃（2400米）及有馬紀念賽（2500米）。現時估計可能剩餘「里見光鑽」遠征法國，爭取為日本首勝凱旋門大賽。

今仗「北部玄駒」大敗，唔少馬迷都擔心呢匹馬嘅健康是否出現問題，而其練馬師清水久詞就有好消息傳出，佢話「北部玄駒」對腳冇問題，身體都冇事，大敗原因與唔適應變化地有關。

「北部玄駒」將休息一段時間，然後問鼎秋季天皇賞。

圖片來源：Twitter