第一天然食品（1076）插到落1年低位載浮載沉，基本數據有番睇頭，要昅昅。第一天然主打冷凍海產食品製銷。集團啱公佈無耐08年半年度（6月底止），營業額4.78億銀（人仔．下同），升咗24%，純利增長22%到1.1億銀，半年度純利，已經追到上07年全年度純利1.3億銀。又家陣祖國出現食、奶品問題，相信好多同胞對食品要求會高咗，第一天然作為「甲級出口商」，產品質素有保證，優勢更大。
好保守計數，第一天然08年度純利，只係keep到上半年增幅，純利挨近1.6億銀，預期PE都係得3.7倍咁大把。又集團上年度全年派息3.6仙（折合約4.1港仙），息率講緊7厘水位。就當集團08年維持番呢個派息，息率回報都肥仔。上望第一天然08年預期7倍PE做目標，集團要上番1字頭，現價（0.57港元）講緊要升87%，小注長線，諗得過。

深控睇實1蚊撈底

深圳控股（604）1年插咗84%，幾乎打回原形，重返02年至06年嘅大型橫行區底部，再跌撈番轉。齋睇圖，深控02年至06年，大致喺1蚊水位上落，深控現價1.22元，已經差無幾。又除非唔睇好祖國地產及經濟，否則，經過呢段調整期，祖國地產市道再起飛，到時，深控又唔係呢啲殘價位。又深控現價折讓61%，已經有唔錯折讓墊底，呢轉睇實1蚊，到價撈底，中線博翻半番，NAV折讓講緊仲有50%，冇有好驚。