日前「欄后」呂麗瑤在網絡上公開十多年前遭性侵一事，引起好多漣漪，包括陶傑同林作都叫人停一停諗一諗。

港姐麥明詩傍晚撰長文，hashtag「#metoo」分享對事件睇法，文章開首表明「相信唔少女仔都曾經遭受性侵犯，我亦都唔例外，仲要係唔止一次。」麥明詩嘅文章短短一個鐘已經有約3600人支持，有人留言鼓勵，對於佢肯公開遭遇同情。

不過亦都有人提出質疑，指性侵犯字眼感覺好嚴重，令人覺得有性接觸，又問性侵犯定義同非禮有咩唔同。麥明詩其後以維基百科cap圖回應，根據網站解釋，「性侵犯泛指一切種類與性相關、且違反他人意願，對他人做出與性有關的行為。可包括強制性交（肛交或口交）、強迫親吻、色狼的性騷擾、非禮、性虐待等，露體、窺淫在司法判例上也可能被算是性侵犯。」解答網民疑問。