再睇返中渝實況，集團家陣手頭土儲，樓面高達970萬平方米（1億平方呎），加上有利好政策支持，中渝土儲size夠，加埋中西部大開發，地區對房住係有剛性需求，嚟緊嘅日子，中渝掂過碌蔗。中渝現價（1.46元），潛喺五年嘅底，唔計任何增值，PB得0.25倍，又去到今年中淨銀貸比率，得14%，殘到爆之餘，財政狀況穩陣到痹。
又當中渝土儲每方呎增值100蚊咁大把，總增值已經講緊上百億元，係市值近3倍！連埋呢個係咁意重秤，中渝NAV上到近10蚊，得0.14倍，吸引到爆！
中渝啱啱派今年半年成績單，純利一支箭大幅增長6倍到8.1億元。就當中渝今年全年純利，只係keep住喺呢個水位，比上年度純利5億元，都講緊增長62%，預測PE由家陣得7倍幾，再跌到得4倍幾。
中渝有半年嘅靚仔成績，坐定粒六。再講，集團喺今年6月底，已經預售但未入數嘅收入，高達161億元，當中，有81億元已銷樓盤，係落成咗，又或者喺下半年落成，中渝預售靚仔，全年表現更加肥仔水。買中渝，煲中線，當翻一番到3蚊計數，PB得0.3倍，仲係超超吸引。