世界難撈，難怪財雄勢大嘅發展商賣樓，好多時都要爭客爭到出晒面。就連賣樓一向好少玩截擊嘅香港興業（480），唔知係咪想快啲套現，抑或俾人截擊得多，今鋪還以顏色，噚日趁長實開賣天水圍栢慧豪園，突然出手，話旗下大嶼山愉景灣尚堤推出全新優惠，向返機場工嘅員工，提供特惠折扣，仲送埋優先揀樓。

踩場拗手瓜

講起興業同長實，兩家發展商過去拗過唔少手瓜，仲拳拳到肉。興業幾乎每次賣樓，長實都唔會埋沒佢嘅截擊本色，一定叉隻腳埋去湊熱鬧，最經典一役，就係東涌藍天海岸鬥映灣園。大家交手無數次，長實映灣園更曾使出終極一招──劈價搶客。
唔知興業係咪俾人截擊得多，學到嘢，今鋪以牙還牙，向對手還以顏色。各大發展商鬥得興高采烈，唔知坐喺一邊嘅新地（016）同恒地（012），會唔會趁高興玩埋一份，話晒樓市都生番晒啦！
好似華華住緊嗰區，樓價都升咗幾成，各大地產商，尤其係上市嗰啲，都要交業績畀股東睇先得，推多幾個新盤出嚟，谷谷個市、搞搞氣氛，等啲代理多啲生意。