由韓國女神孫藝珍與韓劇《機智牢房生活》男星丁海寅合作嘅JTBC新劇《經常請吃飯的漂亮姐姐》（漂亮姐姐）噚日播出第8集，港迷可於Netflix追看劇集。

承接上一集，講到孫藝珍前度話要同歸於盡，車撞上欄杆搞到孫藝珍額頭受傷，丁海寅趕至醫院帶孫藝珍返屋企，丁海寅因為擔心孫藝珍而氣得又擔憂又心痛，並眼紅紅話自己冇孫藝珍就活不下去。孫藝珍見丁海寅嬲豬，就喺床上同丁海寅道歉，兩人喺床上打鬧起來，好鬼親密。

丁海寅話唔想再隱瞞兩人關係，希望堂堂正正公開，孫藝珍話要自己同父親坦白，不過跪喺地上嘅孫藝珍欲言又止、講嚟講去都講唔到，最後激動爆喊，反而爸爸就反問丁海寅喺邊，令孫藝珍得知父親已知情。另一邊廂，丁海寅姐姐發現丁海寅素描上孫藝珍嘅圖畫，即時嬲爆，怒氣沖沖去搵孫藝珍。

噚晚一集收視升咗少少，有5.499%收視。下集預告孫藝珍同丁海寅姐姐嘅友情似乎受到考驗。

更多韓流，喺晒《娛果》
http://fb.com/appledailyent