恒指喺萬九點樓上只企咗3日，又撻番落嚟，跌228點，收18954，期指收市時更大幅低水89點。網友開始問係咪插市嘅開始。《Uwants討論區》網友Jansonmark007就留言話，擔心大市即將出現調整，已經全數沽清近日狂升的中資金融股，包括國壽（2628）及建行（939）。不過佢仲問如果真係再入市，有邊一隻比較穩陣嘅心水股推介吓喎。
網友馳就話先搞清楚穩陣嘅定義係乜先，跌咗可以升返同樣價位，定係跌都唔會比大市跌得多呢？
Aho2001就講，唔使問首選滙豐（005）；而Chung_sl話地鐵（066）及煤氣（002）都係一個唔錯嘅選擇，但Leoleo0753就提醒，5號仔喺外國唔係咁掂，要等到136元價位先好入（咁就可能跌多千幾點），所以要揀公用股，抗跌力強嘛。而本地銀行股恒生（011）亦係不少網友的心水，亦有人提議買跟恒指掛鈎的盈富基金（2600）。

跌市買滙豐唔着數

回顧2000年科網股爆破，大市喺3月28日由高位轉勢下跌，一個月跌咗近2800點，如果散戶喺當日換馬買公用股中電（002）、港燈（006）及煤氣，一個月後佢哋分別升0.3%及3.9%，以及跌0.5%；如果買滙豐及恒生就分別跌6.2%及升4.4%；從以上嘅股價變化嚟睇，跌市時買滙豐未必咁着數，要買都要等到跌至咁上下先好諗，長揸當然是冇乜所謂。