近日兩個勵志故事，埋單計數，同樣暴賺超過5,000倍，一個係李嘉誠退休， 46年一直以股代息買長實，連同重組計，現時勁賺5,000倍。

不過，誠哥以企業家身份長期持股，佢創造價值。而你買股票，係等企業家創造價值，不能相提並論，呢個勁賺5,000倍嘅故事，你想學，都冇資格學。

反而，另一故事騰訊（700）大股東Naspers完美暴賺5,000倍，過程則可以效法。資料顯示，Naspers於2001年斥資3,300萬美元（約2.5674億港元）入股騰訊，以其持股31.51億股計，即每股成本價僅0.0815元，持股至今未計股息已賬面賺達5,391倍。而騰訊自2004年上市，若計及一路以來嘅股息，Naspers每股（分拆後計）已收息4.216元，收息已收多過本錢，本連息每股賺達5,443倍。

一般投機者當然未必可以學到Naspers咁，上市前買到未來驚世巨企。但係騰訊上市後，多年來都處於任買階段，即使今時今日「大跌」，只要你係分拆前買入，根本咩位沽都贏，即使你唔能夠喺IPO前以「ten cents」價格買入騰訊，10蚊、50蚊、100蚊好多人都見過呢啲價位，只係冇買，或者買完升一倍已經沽晒咁解。

Naspers故事最鼓舞嘅地方係，騰訊上市後，估計Naspers對當中創造價值係冇幫助過，專心等管理層創造價值，就同所有香港買股票嘅人心態一樣，希望不勞而獲，17年後醒返已經係國家級富豪。

撇除Naspers背後的陰謀論、亦假設你搵到下一隻騰訊，Naspers嘅故事話俾我哋知，能夠長揸唔沽嘅因素就係：一、用股東錢買股；二、同交易所住得有咁遠得咁遠。騰訊自當年QQ身份上市，每日都有大量報導，波幅亦唔細，日日睇住呢啲新聞一定沽咗十次八次，舊價100蚊乜都冇晒。只有用股東錢唔志在，再加上南非遠得嚟語言不通，先可以對騰訊長升無動於衷。

今時今日好多香港人話對香港死心，要移民，如果咁啱又睇中隻股票，上機前不如落注釘。十七年後再睇，或者到時可以強勢回歸香港。

高明
https://www.facebook.com/bigricetea/