已故歌手陳百強（Danny）離世25年，加上今年係佢60歲冥壽，今晚喺灣仔會展舉行「環球高歌陳百強演唱會」，由陳奕迅（Eason）、關淑怡、陳慧嫻、盧冠廷、劉美君、李幸倪（Gin Lee）等演唱，悼念一代巨星。

而喺大會嘅門票上，見到演出嘉賓包括上月墮樓身亡的盧凱彤（Ellen），大會未有刪除其名字；至於喺大會嘅rundown中，多咗梁詠琪（GiGi）及林珊珊嘅名字，公關澄清GiGi一早已答應演出，只係喺印宣傳海報及門票時趕唔切加GiGi個名，至於原定由Ellen演出嗰部份，就由Yan Ting同Adrian Fu幫手唱。

陳百強嘅家姐及兩位哥哥、Eason爹哋陳裘大、丘亞葵、倪秉郎、姜大衛、李琳琳、鄧光榮太太、連炎輝、小肥、何麗全夫婦、車淑梅與丈夫、薛芷倫、何超瓊、何超儀、黃柏高等去咗捧場，但陳百強父親未有現身。

22:28 Eason同林珊珊合唱完《再見puppy love》後，一齊講：「Thank you大家，thank you Danny！」後完騷

22:24 Eason話自己同唱片公司高層傾唱咩歌時，自己要求唱《再見puppy love》，仲主動提出肯自己去交涉，睇吓可唔可以唱，之後如願唱到，佢仲叫觀眾可以起身郁吓，帶動台下觀眾跳舞。

22:15 Eason唱完歌後喺台上話自己心情好緊張，因為對上一次喺香港演出，已經係1月嘅事，佢仲話：「好期待，期待咗好耐，好開心今晚可以參與呢個咁正嘅晚會，啲歌真係好好聽，我相信Danny會聽到。同埋我成日覺得演唱會係一個好好嘅藉口可以同大家一齊聚首一堂，可以一齊去享受一啲好正嘅氣氛、好正嘅感覺同感受。好開心可以見到大家。」跟住佢話自己同唱片公司要求加唱一首佢好鍾意嘅陳百強嘅歌，然後佢同Adrian Fu合唱《未唱的歌》。

22:12 着住深紫色西裝嘅Eason登場，唱出《深愛着你》

22:09 林珊珊接住上台講：「當年陳百強寫俾我嘅歌，就係呢一首（《戀愛預告》），令我成為當時偶像歌手，Danny自己好鍾意呢一首歌㗎，因為佢曾經同我講過，佢要作一個陳百強嘅版本《戀愛預告》俾我聽，不同嘅演繹，有不同嘅味道，而陳百強係一份簡單嘅味，而且令人期待，深愛住嘅仍然係佢嘅聲音。」然後大屏幕播出Danny唱《戀愛預告》片段一小段。

22:04 GiGi喺台上話：「我哋想去認識一個人，或者去搵一個人好難，如果你有緣同一個人喺地下鐵度相遇幾分鐘，呢幾分鐘喺嗰個年代變得非常珍貴，我好羨慕Danny，係嗰個年代嘅歌手，因為嗰陣時我哋都好單純、好直接，當時Danny憑住佢嘅歌聲，為每一位朋友編織佢嘅荳芽夢。」之後唱出《戀愛預告》。

22:02 GiGi唱《幾分鐘的約會》

22:00 Yan Ting同Adrian Fu合唱《今宵多珍重》

21:57 林珊珊再現身台上分享同陳百強嘅舊事，佢話：「加入電台做DJ後，同陳百強成為好朋友，講吓心事，分享吓夢想，講吓理想，跟住我哋仲同一間唱片公司，佢仲作歌俾我，那些年，我哋溝通嘅方法唔需要WeChat、冇WhatsApp，我哋溝通嘅方法係見面同煲吓電話粥。」林珊珊話有晚陳百強打去佢屋企搵自己，咁啱佢唔喺屋企，平日幫手接電話接到投訴嘅林珊珊細妹，聽到係陳百強打嚟，開心到勁尖叫。

21:51 着住黑灰外套襯低胸裝嘅關淑怡喺台上分享話：「我出道時其實陳百強先生已經差唔多好少演出，但我都有同過佢同台，我當時係新人好怕醜，其實佢喺我心目中係白馬王子嚟㗎，童年回憶嚟㗎！佢所有嘅歌曲係part of my童年回憶之餘，陳百強嘅所有歌曲喺我心目中，都係經典之中嘅經典，冇人可以代替到，係我心目中永遠嘅白馬王子。」佢仲話自己永遠懷念陳百強，今晚唱嘅歌都係佢自己好喜歡嘅歌，其後唱出《漣漪》

21:44 輪到關淑怡出場，唱出《煙雨淒迷》

21:35 Gin Lee出場《眼淚為你流》

21:27 AGA唱《有了你》

21：26 林珊珊再喺台上分享，講到佢開始做DJ，佢話：「有一日監制同我講要有個人節目，訪問一啲新人，我當然訪問陳百強啦，我唔知點解可以攞到佢直線電話，直接打畀佢，喺電話訪問入面，佢講到對電子琴嘅熱愛、對音樂嘅抱負，我忍唔住問佢：『Danny，你記唔記當年聯校舞會有個妹妹，喺你身邊團團轉，你仲話佢跳舞好好睇。』佢記唔記得唔緊要，最緊要我哋每一個人都記得陳百強，Danny Chan。」

21:17 Robynn & Kendy唱《喝采》，之後佢哋再唱出《疾風》，Danny家姐同部份觀眾企起身揮手。

21:13 盧冠廷唱完後指住自己套衫，講佢同陳百強嘅往事：「我今日着得好靚，因為Danny仔曾經同我講過『如果你着得靚唔過我，你就永遠都唔會紅。』佢又講得啱喎，咁我由今日開始就要學佢改變，我知道佢好鍾意着底衫，而我呢件係真嘅底衫，佢平時着嗰啲係designer嘅底衫，雖然係有啲唔同，但學嘢係學唔到盡嘅。」之後佢同Robynn & Kendy唱出《長伴千世紀》。

21:08 盧冠廷唱《突破》

21:07 其後劉美君唱《夢裡人》，大屏幕播《失業生》片段。

20:59 劉美君話陳百強係佢嘅榜樣，而就算對方o依家唔喺度，佢會承繼對方嘅legacy，同埋會保持一個好健康嘅形象做落去，然後就唱出《等》。

20:56 劉美君現身唱《粉紅色的一生》，亦是今晚首位穿陳百強生前最愛紫色作舞衣嘅嘉賓。

20:46 陳慧嫻唱完後講咗句：「其實我同大家一樣偏偏喜歡陳百強」後落台，換Yan Ting、麥家瑜同陳逸璇獻唱串燒快歌，包括《創世記》、《神山也移民》、《偶像》同《冰封的心》，當3人演唱時，舞台大螢幕不時轉換陳百強舊照，當中仲包括佢同強國榮及鍾楚紅嘅合照。

20:41 陳慧嫻登場，唱陳百強嘅《偏偏喜歡你》，舞台右面有陳百強嘅相。

20:38 林珊珊喺台上分享以前中三時，喺聯校舞會遇見陳百強嘅往事，佢話當時最開心係可以喺陳百強面前跳吓舞，仲只求對方望自己一眼，結果陳百強同佢傾偈，仲話：「Hello，你叫咩名呀？你跳舞跳得幾好喎！」林珊珊講完，全場觀眾鼓掌。

20:31 演唱會開騷，首位登場嘉賓係年青鋼琴家張勝量（牛牛），佢彈琴為演唱會拉開序幕。

精選娛聞，喺晒《娛果》
http://fb.com/appledailyent