自爆酒後亂性 偷嘗同志滋味
Geri搞女人拖兩辣妹落水

蘋果日報 2003/03/14 00:00


前辣妹SpiceGirls成員GeriHalliwell,最近自爆曾經同一位女性朋友發生過性關係,呢單消息傳出之後,𠵱家人人都估緊Geri究竟同邊個靚女有過性行為呢?有人推測佢嘅前隊友MelC同MelB嘅嫌疑最大!

MelC被傳係同志
Geri接受訪問時話,佢後生嗰陣有次飲醉酒,之後就同個女性親密朋友偷試「另類雲雨情」,但係同邊個呢?Geri又死都唔肯講!有人話被傳過係女同志嘅MelC,𠵱家同Geri反晒面,好可能就係因為當初兩人發生過關係又唔認帳,所以搞成咁!不過又有人話,Geri以前同MelB咁friend,有過親密關係都唔出奇喎!不過最搞笑嘅係,有人話英國首相貝理雅夫人彭雪玲(CherieBlair)經常同Geri見面,都有啲可能喎,我羅拉就覺得好荒謬喇!
Geri強調自己唔係同性戀,不過未同過女人發生性行為,所以咪心郁郁想試吓囉!另外,Geri又堅稱自己係好保守嘅人,重自稱好耐冇同男人上床㖭,咁究竟有幾耐呢?Geri話:「都有成個月啦!」