當年今日
關於我們

【反斗絕頂】扭買玩具不遂 周文健多次被父扯斷手

蘋果日報 2017/06/18 00:00

父親節大隻佬孟波周文健反斗

周文健(Michael)父親周國換喺《蘋果》訪問中提及個仔細個時好曳,佢舉例時提及Michael着件白色校服去玩,返嚟唔會再見到白色,一定會污糟晒!
係咪咁簡單呢?其實唔止嘅,Michael喺20幾年前一篇訪問中,都認過自己好曳、好任性,佢話細個嗰陣,每次行過玩具店,都一定要買玩,唔買就死都唔走。咁周爸爸唯有拉個仔走啦,但試過幾次被爹哋扯到手骨同膊頭離咗位(應該係指甩咗臼),最後由鄰居幫佢駁番。
講到反斗嘢,原來Michael又試過整蠱屋企個租客,佢話當時自己6、7歲,同屋有個日本人租客,有次Michael見對方搭電梯返工,喺電梯門要閂埋時,Michael就掟隻拖鞋入去,個日本租客唯有開番電梯門,畀番隻拖鞋佢,如是者,Michael又吼人哋就閂電梯門時掟鞋入去,激到對方想鬧但又唔識鬧咁。
雖然係咁,Michael父母雖然喺佢9歲嗰年離異,但佢同居於加拿大及細佢7年嘅妹妹感情要好,後來更隨母移居加拿大。