一代巨星張國榮離開咗我哋已經三年幾，下個禮拜二（12號）就係佢50歲生忌，雖然哥哥嘅好友陳潔靈話過唔再搞大型悼念活動，唔想增添在世者嘅傷痛，但一班長情嘅「RedMission繼續張國榮歌影迷國際聯盟」成員，就決定今年繼續為哥哥嘅冥壽搞紀念活動，秉承哥哥嘅精神、以慈善為目的，幫兒童癌病基金籌款，作為送畀哥哥嘅一點心意。

黃凱芹主持閉幕

紀念活動頭炮係聽日喺維園手球場搞嘅「繼續張國榮慈善日」，到時會播放哥哥生前嘅精采演出片段，設有捐款點歌環節，同哥哥成長歷程嘅圖片展。除此之外，由10號至24號喺星光大道舉行嘅「繼續張國榮星光大道紀念活動」，以及下個禮拜一（11號）至17號喺荃灣愉景新城搞嘅「AllAboutLeslie繼續張國榮珍藏展」活動，幾乎成個9月都係「哥哥月」。
馮仁昭收到風，話黃凱芹會出席17號舉行嘅「繼續張國榮愛心護苗日」，主持閉幕儀式，至於重頭部份，就係下個禮拜二哥哥忌辰正日嘅「共同渡過50年」生日會。捐款超過300蚊或以上嘅fans可以優先留位，每人再畀$350入場費，就可以喺當晚去美麗華酒店參加素食晚宴，一齊做善事緬懷哥哥。