老夫子、大番薯同秦先生,睇過《老夫子》漫畫嘅人一定識佢哋,原來呢套漫畫已經面世咗四十幾年。不過老夫子一啲都唔out,喺下個月上畫嘅動畫《老夫子動畫大電影:反斗偵探》入面,老夫子會變身成《22世紀殺人網絡》主角Neo(奇洛李維斯飾演)咁款,戴黑超兼慢動作避子彈。
大番薯網上徵友
呢個古仔完全同《老夫子》漫畫以舊香港社會背景唔同,而係將故事背景搬到現代網吧,又有大番薯玩網上徵友遊戲。故事大概話大番薯同兩個學生跌入互聯網虛擬世界,於是老夫子同秦先生都走入去虛擬世界,救番啲人出來,有啲似《22世紀殺人網絡》。
行動成唔成功,大家都應該估到。套戲由編劇大師杜國威擔任編劇同導演,係佢嘅「處男作」動畫作品,重搵到《老夫子》原作者王澤做創作總監。雖然下個月先上映,不過發行商認真識搵錢,噚日開始發行呢個電影嘅漫畫版,一套五冊,每本賣二十五蚊。睇慣舊版老夫子,會唔會諗吓呢套彩色作品呢?
連老夫子都識與時並進,唔知信奉儒家思想嘅董生,喺經過7.1遊行同今次區議會選舉後,可以進步到幾多?
傳真︰2623-9278
電郵︰[email protected]